見 證 分 享

我對主認識唔深，屋企人係拜神，自己一向沒有特別信仰，因男朋友是北角堂會友，帶我來到北角堂中堂崇拜。起初都有點擔心怕返教會唔習慣，身邊朋友曾經都說過教會有好多規矩規範，例如十一奉獻，返開唔返唔得，自己都聽過有啲係邪教等。我抱著嘗試心態，返咗一段時間，感覺都好舒服,沒有我諗的壓迫感。之後，透過啟發課程和不一樣的生命課程，更加了解自己和認識主耶穌,感受到教會弟兄姊妹關心同關愛，互相幫忙。我未認識主之前，我是一個只相信自己的人，覺得任何事只要自己能夠解決，唔喜歡麻煩別人。可能因為自小在家中排行最大，最愛錫我的婆婆在我十多歲就離開了，爸爸嗜賭唔顧家，媽媽擔起外出工作賺錢照顧我們,所以好多事情盡量自己解決，唔想麻煩加添媽媽壓力。沒有傾訴對象，自我形象好低，怕同學朋友睇唔起自己，唔敢同佢哋玩。可能因為這些原因，唔係好信任別人同收埋自己，好少同家人朋友分享自己情感。到長大出來工作，認識咗幾位好朋友，同時透過一位要好的舊同學認識到很愛錫我的男孩，這時的我感覺很開心、幸福、被愛的感覺同多咗一位樣樣關顧自己感受的人，但這樣只維持了兩年多，沒想到當初介紹的好朋友會介入這段關係，令我更加再不信任任何人，變得更自我，更收埋自己。之後多年都不願意用心結識新朋友，只是和我出來工作已認識的幾位朋友聯絡，這幾位朋友亦都是我最好最好的知己。但不知什麼誤會原因，認識咗多年陪我共渡患難的朋友突然唔想理會我。因這事有道歉過，都沒用。當時我真係好唔開心同失落，就在這時候，啟發課程透過弟兄姊妹關愛；學會分享同禱告，更加認識全能的上帝，把自己唔開心或開心的事告訴上帝，雖然禱告完，當時沒有太大幫助，但心情就變得平靜同放下，慢慢歡喜返教會返小組團契生活，個人心情開心開放咗。

後來因事一段時間沒有返小組及崇拜，感覺很不習慣，之後決定再返中堂崇拜，多點認識主，透過詩歌聽道親近上帝。雖然這樣，但不愉快的事情都會出現，在大前年平安夜，媽媽唔舒服中風入院，好彩早一日妹妹發現媽媽說話唔清楚，組織能力有問題，幸好我未出發旅行，才能夠可以及早安排醫治，醫生說媽媽腦部有幾點血塊，影響語言能力，沒有影響行動。當時的我好驚唔知可以怎樣，只是禱告，神真係有聽我禱告，慢慢媽媽就康復，又肯在飲食和運動方面努力。好朋友方面又慢慢關係變得沒事了和好了。這時在每一次復活節、聖誕節都想洗禮，對聖經好多嘢都唔太清楚，擔心好多,但我相信只要信，神就會引領我一路行。再一次體會弟兄姊妹的關愛，係家聰爸爸患癌病時，雖然都好痛苦但見證到他對神的依靠，神亦應允透過教會牧師、教友面前完成他同太太提早見證結婚45週年。雖然世伯係離開咗，但感受到教友的每一個祝福同幫忙，我都希望自己洗禮後，效法基督榜樣。